Unu spàziu di cundivisioni di mirati vizini e luntani.
Da la rubrica:
L'Animu Russu
Da lu primma cussu di littaratura russa a l’ùltimu, la cuscènzia è sempri li mattessi: li russi, in cassisia èpuca, so capazzi d’ abrì balconi ill’anima tòja e mustratti fiòri pal fiòri lu chi v’è pintatu. Passi da lu stùdiu di l’impultànzia di la mutesa di Tjutčev a lu diàlogu cuatu indrentu a dugna diàlogu di Dostoevskij. L’Omu russu, chi sei puru tu, chi semu tutti, faci e sfaci, suffri e si ni ridi, sempri cu’ li mattessi occji. Passa lu tempu “ascultendi“ li stélli com’e Majakovskij, e com’e iddu s’incendi di luci.
Riolta e carraggja lu chi è statu primma d’iddu, cun nói aspirazioni, com’e un искра chi no si spigni mai. Sunnia sempri, com’e li passunaggji di Platonov, cilca un venidori in pianeti chi s’ani ancòra di scubrì, di raggjugnì cun màcchini chi so ancóra di pinsà. Cilca ulganizzazioni in manéri chi póni sólu disulganizzà.
L’animu russu chi aggju éu, chi ai tu, chi aemu tutti, è lu disìciu di l’Akmàtova d’aè torra so' maritu, e d’esse lìbara di faiddà cu’ lu fiddòlu in galéra. S’agatta illu fritu d’ un viaggju in trenu a matina, cun Pasternak ill’ariccji chi ti dici:
“In dugna cosa éu voddu arrià
A la palt’essenziali.
Illu trabaddu, illa strada di fà,
Illu cucioni chi ti ni pidda lu córi.
A l’essènzia di li mumenti passati,
Di li rasgiòni primmi,
A la marudda di la schina, li fundamenti,
A li radichi più véri."
1956`
L’Epuca di Pratta, li passoni, l’istoria
L’èpuchi letterari russi so stati tutti preziósi abbeddu, tantu da esse ancóra mintuati com’e l’èpuca d’oru e di pratta. Di “l’Epuca d’Oru”, celtu, cunniscimu Puskin, Dostoevskij, Tolstoj... chi no bàstariani déci libri pa’ dugnunu pa’ discriilli a livèllu di cuntinuti, a chistu stilisticu.
Invecci di “l’Epuca di Pratta” si saci abbeddu di mancu, a lu mancu tra li passoni. É un mumentu cussì densu, cussì prenu in sensu di crativitai, chi ancóra óggji vènini apprufunditi da studiósi intalnaziunali e si cilca di uldinàllu in currenti, cosa chi, pa’ abbeddu scrittóri di l’epuca, risulta diffìcili meda. Li puèti russi di chistu mumentu, chi podarìami ingjittà com’e lu mamentu chi anda da l’ùltimi deci anni di l’ ‘800 a l’anni ‘inti- trinta di lu ‘900, e pa’ esse precìsi, nasci cu’ la puisia di Blok “Velsi pa’ una bedda signora”. Abbeddu studiósi vóni però includì in chistu mamentu pueticu ancóra un altu paggju di testi, com’e lu manifestu “Innantu a li muttii di lu declinu di la littaratura russa contemporanea”, di Dimitrij Sergeevic Merezkovskij(1893).
É un mumentu di riolti sociali, culturali, morali. Pa’ folza di cosi, (sendi la littaratura esprissioni di lu sintitu di l’Omu), un muntoni di muimenti incumenciani a nascì e culà a riaréddi da dugna biccu di li stradi, di li casi, di li lóchi di trabaddu, di li cilculi undi l’intellighencija s’attuppaa. È lu mamentu di la nàscita di lu simbolismu russu, di l’Acmeismu, di lu Futurismu, di l’Analchismu Misticu, nóa puisia cuntadina...tuttu lu chi v’éra statu finz’a chistu mamentu, finz’e che lu Realismu russu, no éra più capazzu di discriì lu capu, lu sintitu, la realitai di li passoni. Chistu si rifletti no sólu illa puisia, ma puru ill’arti visivi, illa musica, illu cinema. Óggji pinsemu a la riolta socialista e l’unica cosa chi ci ’eni in menti è: regime, censura, espatriu. Ma lu chi no sapemu è chi da lu 1917 finz’a l’anni coranta vi so stati pulìtichi abbeddu diffarenti da palti di lu statu soviéticu in àmbitu culturali.
Dapói di la riolta di Santigaini, l’intellighencija, puru siddu chi chistu sensu di processu di mutesa lu intindìa gja da anni, incumència a rasgiunà ancóra di più innantu a la pusizioni, lu rólu chi doariani aé l’intellettuali e la cultura. Arréa un mumentu undi si spacca di lu tuttu: calch’e unu sustinia la riolta, ma v’éra ancóra cal’éra dudósu e no aia présu pusizioni e ca invecci vidia la rivoluzioni com’e l’apocalisse, la molti di la cultura, di lu mundu, di la Russia.
La necessitai di lu statu d’alluntanà l’intellettuali chi no sustiniani la riolta, éra liata a la cuscènzia chi siani la littaratura, l’arti, la puisia, chi modellani e fràicani l'anima di li passoni di lu tempu ’enidóri: la scrittura diventa impultanti pa’ la propaganda di lu paltitu. Li bolscevichi érani attratti da l’idea di costruì calchi cosa di nóu avvéru, chi no fùssia esistitu primma di chiddu mumentu. Un mundu fattu pa’ li gjinirazioni nói, palchì éra tra li ciòani chi éra più pisuta chista necessitai: la di lu passatu, spazzarli via comu dicia Majakovskij da la “batellu di la modelnitai“. Diciani: di Puskin, di Dostoevskij e di Tolstoj noi no ci ni femu nudda. Noi semu saliti illu batellu di la modelnitai e andemu addanzani velsu lu tempu ’enidori.